ವಾರದ ಬಡ್ಡಿ ಹಣ ನೀಡದ್ದಕ್ಕೆ ಮನಸೋ ಇಚ್ಛೆ ಹಲ್ಲೆ

ವಾರದ ಬಡ್ಡಿಯ ಹಣ ನೀಡದಿದ್ದಕ್ಕೆ ವ್ಯಕ್ತಿ ಮೇಲೆ ಮನಸೋ ಇಚ್ಛೆ ಹಲ್ಲೆ ನಡೆಸಿರುವ ಘಟನೆ ಬೆಳಗಾವಿ ಜಿಲ್ಲೆಯ ರಾಯಬಾಗ ತಾಲೂಕಿನ ಖನದಾಳ ಗ್ರಾಮದಲ್ಲಿ ನಡೆದಿದೆ.

ಬಡ್ಡಿ ನಾಗಪ್ಪ ಮಾಯಪ್ಪ ವಡ್ಡರ ಎಂಬಾತ ರೋಹಿತ ವಡ್ಡರ ಎಂಬುವವನ ಮೇಲೆ ಹಣದ ವಿಷಯಕ್ಕೆ ಮನ ಬಂದಂತೆ ಕಲ್ಲಿನಿಂದ ಹಲ್ಲೆ ನಡೆಸಿರುವ ವಿಡಿಯೋ ವೈರಲ್ ಆಗಿದೆ.

ರೊಹೀತ ವಡ್ಡರ್ ಎಂಬಾತ ವಾರದ ಬಡ್ಡಿಗೆ ಎರಡು ಸಾವಿರ ಹಣವನ್ನು  ಬಡ್ಡಿ ನಾಗಪ್ಪ ಮಾಯಪ್ಪ ವಡ್ಡರ ಬಳಿ ಪಡೆದಿದ್ದ.

ಎರಡು ಸಾವಿರ ಹಣಕ್ಕೆ ವಾರಕ್ಕೆ 500ರೂ. ಬಡ್ಡಿ ಕೊಡಬೇಕಿತ್ತು. ಒಂದು ವಾರ ಬಡ್ಡಿ ಹಣ ಕೊಡಲು ತಡವಾಗಿದ್ದಕ್ಕೆ ಮಾರಣಾಂತಿಕ ಹಲ್ಲೆ ನಡೆಸಲಾಗಿದೆ ಎನ್ನಲಾಗಿದೆ.

ಕಲ್ಲಿನಿಂದ ತಲೆಗೆ ಬಲವಾಗಿ ಹೊಡೆದು ಅಮಾನುಷವಾಗಿ ಹಲ್ಲೆ ಮಾಡಲಾಗಿದೆ. ಹಲ್ಲೆ ಮಾಡಿರುವ ವಿಡಿಯೋ ಮೊಬೈಲ್ ರೆಕಾರ್ಡ್ ಆಗಿದೆ.

ಸದ್ಯ ಹಲ್ಲೆಗೊಳಗಾದವನಿಗೆ ಹಾರೂಗೇರಿ ಪಟ್ಟಣದ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ.

ಹಾರೂಗೇರಿ ಪೊಲೀಸ್ ಠಾಣಾ ವ್ಯಾಪ್ತಿಯಲ್ಲಿ ಘಟನೆ ನಡೆದಿದೆ. ಹಾರೂಗೇರಿ ಪೊಲೀಸ್ ಠಾಣೆಯಲ್ಲಿ ನಾಗಪ್ಪಾ ವಡ್ಡರ ವಿರುದ್ದ ಪ್ರಕರಣ ದಾಖಲಾಗಿದೆ.